وما زال مسلسل الموت مستمرا
ليه شبابنا بيفضل الموت وهو بيحاول يسافر ولا انه يعيش فى بلده؟
متهيالى ده سؤال لازم كلنا نفكر فيه خصوصا بعد ما زادت جدا حوادث
الشباب اللى بيفقدوا ارواحهم اثناء الهجرة الغير شرعية ومازال حلم السفر
بيغرى كل شاب انه يعمل المستحيل عشان يهرب من واقع مر عايشه فى بلده
يا ترى احنا السبب فى ان اولادنا شايفين الدنيا هنا سودا والاحلام الوردية فى
السفر ولا واقع مجتمعنا الاليم اللى احبط كل الشباب ...طيب الولد او الشاب اللى
مات مؤخرا على عجلات طائرة متجهة لفرنسا ده لسه مخلصشى دراسته يعنى لسه
لم يصطدم بالواقع الاليم اللى بيعيشه كل الشباب لما ينتهوا من دراستهم ويفضلوا
يدوروا على شغل بلا فائدة ويشتغلوا فى غير تخصصه...المهم مين السبب فى ده
احنا بسخطنا على الحياةولا مجتمعنا اللى اتغير ولا حكومتنا اللى بتدفع شبابنا للهرب
ولو بالموت ولا يعيشوا هنا...احداث مؤلمة وحوادث اكثر ايلاما لكن فى النهاية مفروض
نعمل ايه عشان نحافظ على ولادنا من الموت قهر او الموت هروب متهيالى انا هافضل
فاكرة صور الشباب دول اللى ماتوا فى البحر واللى ماتوا فى الجو واحضن ولادى
واتمنى انهم لما يكبروا ميوصلش بيهم الحال للدرجة دى انهم يغامروا بحياتهم عشان فرصة
افضل فى الحياة وربنا يرحم شبابنا اللى عايشين واللى فى ذمة الله
posted by جسر الى الحياة @ 6:32 AM
2 Comments
2 Comments:
هما معذوريين بالطبع ؛ لأنهم فى الأول والأخر بيبحثوا عن فرصة لتحسين حياتهم فى مقابل الموت كمداً بسبب واقعهم الأليم .. البلد مقفولة وعايزيين يلاقوا فرصة .. أى فرصة تغير واقعهم للأحسن شوية .. امزجى دة بقة ببعض السذاجة والتسرع والحمق تلاقى النتائج دى كلها .. لازم كان يعرفوا ويتعلموا الأول يعنى ايه فرصة قبل ما يجروا وراها .. لازم كانوا يتثبتوا من كونها فرصة بالفعل وخصوصا أن فيه حوادث كتير سابقة مماثلة .
فى انتظار تدويناتك دائما
:)
اولا اشكرك لمتابعة المدونة ثانيا مشكلة الشباب النهاردة انهم فاقدين الصبر بمعنى هما عايزين فرصة اول ما تلوح فى الافق يجروا عليها بدون حساب مبدا المكسب والخسارة اهى فرصة تخرجهم من عنق الزجاجة اللى خنقهم لكن عندى امل ان حال البلد ينصلح وتتمسك بولادها بدل ما تطفشهم ولو ارتموا فى احضان الموت
Post a Comment
Subscribe to Post Comments [Atom]
<< Home